С.Одонтуяа: Бид мэдлэг, боловсрол, сэтгэл зүтгэл, хатуужлаараа дэлхийн манлайлагч эмэгтэйчүүдийн түвшинд хүрэх ёстой
    2018 оны 10 сарын 15 нд
    0c9420186d614c0d8b8a6acc2b7c021d.jpg

    “Ардчилсан эмэгтэйчүүдийн холбоо”-ны бүх шатны тэргүүнийг сонгох сонгууль орон даяар үргэлжилж байна.  “Ардчилсан эмэгтэйчүүдийн холбоо”-ны тэргүүнд нэр дэвшигч Салдангийн Одонтуяатай ярилцлаа.

     

    -Монголын улс төр, нийгмийн хүрээнд томоохон орон зай эзэлдэг “Ардчилсан эмэгтэйчүүдийн холбоо”-ны бүх шатны тэргүүнийг сонгох сонгууль эхэллээ. Энэ сонгууль хэрхэн явагдах вэ?

     

    -“Ардчилсан эмэгтэйчүүдийн холбоо”-ны сонгууль Монголын улс төр, олон нийтийн анхаарлын төвд байна. Ардчилсан нам 2016 оны сонгуулийн үр дүнд шинэчлэгдэх ёстой гэдэг захиа, даалгаварыг Монголын ард түмнээс авсан гэж би ойлгодог. Сонгуулийн дараачаас эхэлсэн намын шинэчлэлийн ажил хоёр жил гаруй үргэлжилж байна. Шинэчлэлийн хүрээнд гишүүддээ суурилсан, бодлогын нам болох чухал зорилт дэвшүүлээд байгаа. Энэ зорилтынхоо дагуу намын дарга, бүх шатны удирдлага болон намын дэргэдэх байгууллагуудын тэргүүнийг анхан шатны гишүүдийн саналаар тодруулж байхаар шинэчилсэн дүрэмдээ тусгасан байдаг. “Ардчилсан эмэгтэйчүүдийн холбоо”-ны сонгууль энэ сарын 5-наас эхэлж, арваннэгдүгээр сарын 5-нд дуусна. Нэр дэвшигчид 21 аймаг, нийслэлийн есөн дүүргээрээ нар зөв тойрохоор хуваарь гаргаад байна. Бид наран мандах нутаг Хэнтий аймгаас уулзалтаа эхэлж, хуваарийн дагуу  ажиллаж байна.

     

    -Та 2016 онд тус холбооны тэргүүнээр дөрвөн жилийн хугацаатай сонгогдсон шүү дээ. Яагаад гэнэт сонгууль зарлах болчихов гэдэг сонирхол татлаа?

     

    -Энэ удаагийн сонгуулийг зохион байгуулах саналыг би гаргасан юм. Хэдийгээр миний бие “Ардчилсан эмэгтэйчүүдийн холбоо”-ны тэргүүнээр дөрвөн жилийн хугацаатай сонгогдож, улмаар хоёр жил гаруйн хугацаанд ажиллаж байгаа боловч Ардчилсан намын шинэчлэлийг иж бүрэн хэрэгжүүлэхийн тулд дээрх шийдвэрийг гаргасан. Саналаа “Ардчилсан эмэгтэйчүүдийн холбоо”-ны зөвлөлдөх хорооны хурал болон намын удирдлагуудад танилцуулж, батлуулсан.

     

    -Өмнөх сонгуульд илүү олон нэр дэвшигчөрсөлдөж байсан. Энэ удаагийн сонгуульд цөөн нэр дэвшигч өрсөлдөж байгаа юм байна. Уг нь танай нам манлайлагч эмэгтэйчүүд олонтой шүү дээ?

     

    - Ардчилсан намын зохион байгуулдаг дотоод сонгуулиуд маш өрсөлдөөнтэй болж өрнөдөг. Энэ удаагийн сонгуульд манай намд бүртгэлтэй бүх эмэгтэйчүүд нэр дэвшин өрсөлдөх эрх, боломж бол нээлттэй байсан. Нөгөө талаар бол бид монголын эмэгтэйчүүдийн хөгжлийг дэмжих, тэдний эрхийг хамгаалахын төлөө 2030 он хүртэл стратеги төлөвлөгөө боловсруулаад дөрвөн жилийн хугацааны үйл ажиллагааны төлөвлөгөө гарган ажиллаж байгаа. Нэгэнт эхлүүлсэн энэ ажлыг намайг дуусгаасай гэж манай намын олон лидер эмэгтэйчүүд илэрхийлж, энэ удаагийн сонгуульд хамтран ажиллаж байгаа. Надтай өрсөлдөж байгаа манай намын гишүүн Ц.Цэрэндолгор, Т.Пүрэвхатан нарын хувьд ч маш чадварлаг, тууштай, хичээл зүтгэлтэй, оюунлаг эмэгтэйчүүд.Тэднийг маань дэмжиж байгаа маш олон эмэгтэйчүүд байгаа. Тэгэхээр энэ удаагийн сонгууль бол маш өрсөлдөөнтэй явагдана гэж бодож байна.

     

    -Энэ удаагийн сонгуулийн уриа их сонирхол татлаа?

     

    -Ер нь бид энэ сонгуулийн уриаг маш их бодсон. Нэлээд хэлэлцэж ярилцсаны үндсэн дээр “Сэтгэлийн хүч” гэдэг уриатай байя гэсэн шийдэлд хүрсэн. Яагаад гэвэл монголын улс төрд, улстөрчдөд эрх мэдэл, мэдлэг боловсрол, хөрөнгө мөнгө гээд юу ч дутаагүй. Харин улс орноо гэсэн халуун сэтгэл хамгийн ихээр дутагдаж байна. Тиймээс бид энэхүү уриаг сонгуулийнхаа уриа болгоё гэж шийдсэн. “СЭТГЭЛИЙН ХҮЧ” гэдэг хоёрхон үгэнд бидний хэлэх гэж хүссэн,хийхээр зорьж байгаа ажлууд бүхэлдээ илэрхийлэгдэж байх шиг санагдсан.

     

    -Та энэ удаагийн сонгуульд ямар зорилго өвөрлөн нэр дэвшиж байна вэ?

     

    - Энэ удаагийн сонгуулийн гол зорилго нь хэн нэгнийг даргаар сонгохдоо биш гэж би харж байгаа. Нийгмийн сайн сайхны төлөө, шударга бус зүйлтэй тэмцэхийн тулд эмэгтэйчүүд эвлэлдэн нэгдэж, гишүүд дэмжигчдийнхээ идэвхийг сэргээж, холбооныхоо шинэ дүрмийн төслийг хэлэлцэж, намын дэргэдэх хүчирхэг хөгжлийн институцээ бэхжүүлж, эмэгтэйчүүдийнхээ манлайллыг, урам зоригийг сэргээн хүчээ нэгтгэж ажиллах ёстой. Би монголын айл гэрт байгаа эмэгтэй хүний эрхийг хамгаалахын төлөө, өргөн уудам эх орныхоо төв суурингаас эхлээд орон нутагт байгаа эмэгтэй хүн бүрийн эрхийг хамгаалж, хангахын төлөө, монголын улс төрд тэдний дуу хоолой болсон олон хүчирхэг эмэгтэйчүүдийг нэгдмэл байлгахын төлөө, бүх шатны сонгуульд эмэгтэйчүүд эрчүүдтэйгээ адил хэмжээнд нэр дэвшиж, өрсөлдөж, ялалт байгуулж чаддаг байлгахын төлөө би энэ удаагийн сонгуульд оролцож байна.

     

    -Та холбооны тэргүүнээр ажилласан өнгөрсөн хоёр жилийн хугацаанд ямар ажил амжуулав?

     

    -Ардчилсан намын эмэгтэйчүүд бол дандаа шинийг санаачлагчид, байнга бусдын тэргүүнд явдаг хүмүүс байдаг юм. Энэ ч утгаараа Ардчилсан эмэгтэйчүүдийн холбооны хувьд өнгөрсөн жилүүдэд нийгэмд чиглэсэн олон ажлуудыг санаачлан хэрэгжүүлсэн. Жишээлбэл “Хүүхдийг цахим халдлагаас хамгаалъя” аяныг эхлүүлж, холбогдох байгууллагуудад уриалга хүргүүлж,хамтарч ажиллаж байгаа.Энэ санаачилга өнөөдөр “Unfriend” хөдөлгөөн болж улс орон даяар өргөжиж,үр дүнгээ өгч байгаад баяртай байна. Мөн ”“Охид бүсгүйчүүдийг хүчирхийллээс хамгаалах” чиглэлээр нийгэмд дуу хоолойгоо хүчтэй хүргэж чадлаа. Тухайлбал олон нийтийг цочроосон 13 настай охины амь насыг хэрцгийгээр бүрэлгэсэн хэрэг дээр манай холбооны хуульчид зүтгэл гарган ажилласан. Өнгөрсөн онд болсон Ерөнхийлөгчийн сонгуулийн үеэр “Амлалт асуух ээжүүд” контент аяныг санаачлан 21 аймаг, есөн дүүргийн "Ардчилсан эмэгтэйчүүдийн холбоо"-ны салбар холбоодыг удирдамжаар хангаж орон даяар хүчтэй өрнүүлж чадсан. Бүсийн чуулган, Удирдах ажилтны зөвлөгөөн, улс төрийн манлайллын сургалт, хэлэлцүүлгүүдийгтогтмол амжилттай зохион байгууллаа. Бид түрүүлж дуугарч нийгмийг манлайлж байна. Харин одоо АЭХ -ны гишүүд, дэмжигчид, ээжүүд бид хойч ирээдүйнхээ сайн сайхны төлөө хүчээ нэгтгэж,  тэмцэх цаг болжээ.

     

    -Ажил хэрэг болгож амжаагүй ажлууд ч цөөнгүй байгаа болов уу?

     

    -Бид гишүүдийнхээ дунд дотоод, гадаадад маш олон сургалт зохион байгуулж эхэлсэн. Стратеги төлөвлөгөө гаргаж, 2030 он хүртэл хийх ажлаа бүрэн төлөвлөн ажиллаж байгааг дээр дурьдсан. Бидэнд хийх, хэрэгжүүлэх маш олон ажлууд байна. Тухайлбал, холбооны зүгээс эмэгтэй улс төрчдөө чадавхжуулах, манлайлагч болгох, ёс зүйтэй байх, зөв имиджийг бүрдүүлэх, улс төрийн соёлд суралцах боломжийг хангаж, энэ төрлийн сургалтуудыг шат шатанд нь зохион байгуулна. Бид дэлхийд хүлээн зөвшөөрөгдсөн улс төрч эмэгтэйчүүдийн хэмжээнд очихын төлөө ажиллах ёстой. Дэлхийн хэмжээний эмэгтэй улстөрчдийнсэтгэлийн хат, уйгагүй чанар, дайчин зүтгэл, олон жилийн тэмцэл, ур чадварт ойртохын тулд манай холбооныхон хичээн ажиллах болно. Өөрөөр хэлбэл, Ардчилсан эмэгтэйчүүдийн холбоог бид чадварлаг гишүүд, хүчирхэг хөгжлийн институц болгон бэхжүүлэхэд л анхаарлаа хандуулна.

     

    -Таны хувьд өнгөрсөн дөрвөн жилд УИХ-ын гишүүнээр ажилласан. Энэ хугацаандаа та иргэдэд хэрэгтэй ямар ямар хуулийн төсөл санаачлан батлуулав?

     

    -Би 2012-2016 онд УИХ-ын гишүүнээр ажиллахдаа 10 хуулийг санаачлан хэлэлцүүлж, батлуулсан байдаг юм. Мөн 10 хуулийн төсөл боловсруулах ажлын хэсгийн ахлагчаар ажилласан байдаг. Мөн 60 гаруй хуулийн төсөл боловсруулах ажлын хэсгийн гишүүнээр орж ажилласан байдаг. Тэр болгоныг ярина гэвэл маш их цаг хугацаа орно л доо. БИ чинь ер нь их хэнхэг хүн шүү дээ.Гол гэж боддог зургаан хуулиа онцолъё. Эрүүл мэндийн даатгалын тухай хууль, Эмнэлгийн тусламж үйлчилгээний тухай хууль, Хүүхдийн эрхийн тухай хууль, Хүүхэд хамгааллын тухай хууль,мөн Хөгжлийн бэрхшээлтэй иргэдийн эрхийн тухай хууль, Гэр бүлийн хүчирхийлэлтэй тэмцэх тухай хууль дээр голлох үүрэгтэй оролцож батлуулсан.2012-2016оны Эмэгтэй гишүүдийн бүлэг ч нэгдмэл санаагаар ,урамтай ажиллаж байсныг дурьдахгүй байхын аргагүй.

     

    -Та УИХ-ын гишүүнээр ажиллаж байгаад Баянгол дүүргийн Засаг даргаар ажилласан хүн. Гишүүн байсан хүний хувьд нэлээд эрс сонголт шиг санагддаг шүү?

     

    -Хамт парламентад сууж байсан гишүүд ч гэсэн намайг анх Баянгол дүүргийн Засаг дарга болоход их гайхаж хүлээж авсан. Яг үнэндээ бол надад зайлшгүй дуусгах ёстой хэд хэдэн чухал төсөл байсан. Би бол “Ажил хийвэл дуусга. Дуусгаж чадахгүй бол битгий эхэл” гэсэн зарчимтай хүн. Өмнөх дөрвөн жилд эхлүүлсэн олон бүтээн байгуулалтын ажлууд тэр дундаа Хүүхдийн эмнэлэг, Ахмад настны нөхөн сэргээх эмнэлэг, Баянгол дүүргийн спорт комплекс, Гэр бүл ёслолын ордон, Ахмад хөгжлийн ордон, Баянгол хүүхдийн зуслан, Баянгол агропарк гэх мэт чухал төслүүдийг зайлшгүй дуусгаж үйл ажиллагааг жигдрүүлэх хэрэгтэй байсан учраас Баянгол дүүргийн Засаг даргаар ажиллахаар шийдсэн. Баянголчууд бид дээрх бүх л төслүүдийг маш амжилттай хэрэгжүүлж чадсан. Байшин барих нэг хэрэг л дээ. Гэхдээ дотор нь явагдах үйл ажиллагааг менежментийн хувьд асуудалгүй авч явна гэдэг хэцүү. Гэхдээ бид багаараа энэ бүхнийг хийж чадсан. Өнгөрсөн таван жилд Баянголчууд зөвхөн эрүүл мэндийн салбарт гэхэд л том жижиг нийлсэн 14 эмнэлэг барьж иргэддээ хүлээлгэж өгсөн. Бусад бүх салбарт амжилттай ажилласан.

     

    -Танд амжилт хүсье.

     

    -Баярлалаа. Миний бие хуримтлуулсан туршлага, мэдлэгтээ түшиглэн эмэгтэй гишүүдээ хөгжүүлэх, улс төрийн бодлого боловсруулах чиглэлээр олон улсын болон ТББ -уудтай хамтран тогтмол сургалт, хэлэлцүүлэг, уулзалт, дотно яриа зохион байгуулж, төрийн бодлогыг тодорхойлоход намын эмэгтэй гишүүдийн оролцоог өргөжүүлэх боломжийг бий болгохын төлөө та бүхэнтэйгээ тууштай хамтдаа, олуулаа хамтран ажиллаж ялалт амжилтанд хүрнэ гэдэгт итгэлтэй байна. Хараад суухыг үл хүсч, хамтдаа зүтгэн, улс төрийн тавцанд ялалт байгуулахын төлөө ардчилсан эмэгтэйчүүд бид үеийн үед манлайлах болно.