Цөмийн цохилт!
    2017 оны 05 сарын 01 нд
    516c4d3f1aa514f83d1b2a2a211b6b77.jpeg

     

    Өнөөдрөөс зарим төрлийн татвар нэмэгдэж байна. 
    17 хоногийн өмнө УИХ судалгаа муутай, иргэдийнхээ бодит амьжиргаанд түшиглээгүй хэм хэмжээ тогтоосон. 
    Судалгаагүй, богино зайнд эдийн засгийг сэргээх гэсэн энэхүү "бодлого" нь урт хугацаан дах эдийн засгийн өсөлтийг боомилж, улмаар Үндэсний эрх ашигт ноцтой хохирол учруулахаар байна. Ямар татварууд нэмэгдэж байгааг эргэн санацгаая.  

    Долоон төрлийн татвар нэмсэнийг дахин сануулъя.        
    1. Архи тамхины онцгой албан татвар. 2. Импортын тамхины гаалийн албан татвар. 3. Автобензин, дизелийн түлшний онцгой албан татвар. 4. Суудлын автомашины онцгой албан татвар. 5. Хувь хүний орлогын албан татвар, 6. Хадгаламжийн хүүгийн орлогын татвар, 7. Нийгмийн даатгалын сангийн шимтгэлийг нэмэгдүүлэв.   

    2. Монголын Үндэсний Худалдаа, Аж Үйлдвэрийн Танхим хэвлэлийн хурал хийж, УИХ-аас гаргасан дээрх шийдвэрүүдэд  шүүмж өгч, шахалт шаардлага өгөөд ч үр дүнд хүрсэнгүй. (1)Төсвийн зардлыг 2017 оны батлагдсан төсвөөс огт нэмэгдүүлэхгүй байхыг, (2) Төрийн захиргааны албан хаагчдын тоог бууруулах асуудлаар, (3) Нийгмийн даатгалын шимтгэлийг нэмэгдүүлэхгүй байхыг, (4) Хувь хүний орлогын албан татварыг нэмэгдүүлэхгүй байхыг, (5) Онцгой албан татваруудыг нэмэгдүүлэхгүй байхыг тус тус шаардаж, тэтгэвэрийн насны асуудлаар судалгаанд суурилсан шийдвэр гаргахыг сануулав. Тусыг эс олж байна. 

    3. Ардын намын тоть шиг ишилж буй Олон Улсын Вальютын Сангийн Монгол Улс дахь суурин төлөөлөгч Нийл Сакерын хэлж буйгаар бол "Ямар зардлыг танах эсэх нь Засгийн газрын өөрийнх нь асуудал" гэж онцолсон байх юм. Уул шугамандаа бол ТАТВАР нэмээдэх гэж зарлигдаагүй бололтой. Харин төсвийн тансаглал, зардлаа бууруул гэж зөвлөсөн нь тодорхой. 

    4. Гэсээр байтал эрх баригчид бодлогын хоёр том АЛДАА-г гаргалаа. Нэг. Санаатай алдаа. Энэ нь өөрсдийн тансаглалаа, үрэлгэн зардлаа танаж чадахгүй нийгмийн суурь хүч болсон дундаж орлоготой иргэд, дундаж давхрагадаа эдийн засгийн цөмийн цохилт өглөө. 300 саяар шинэ машин унадаг дарга нартаа хариуцлага тооцохын оронд 3 сая иргэнийхээ нуруун дээр ачааны хүндийг үүрүүлэв. Хоёр. "Санаандгүй" алдаа гэдэг нь үнэхээр судалгаа, тооцоотой, ултай мөрийн хөтөлбөр алга. Судалгаанд суурилаагүй хальтирган бодлого нь үнэхээр мэргэжлийн бус шийдвэрүүдэд хүрч байна. 

    5. Өнөөдөр хэрэгжиж эхэлж буй татваруудын зөвхөн нэгийг энэ удаад онцлоё.  Суудлын тэрэгний онцгой албан татвар. Монгол Улс 2016 оны эцсийн байдлаар нийт 499.152 автомашинтай. Үүнээс 360.513 нь суудлынх, 111.431 нь ачааных, 18.912 нь автобус, 8.296 нь тусгай зориулалтынх. Харин хувийн тэрэг бол 412.290 ширхэг байна. 80 гаруй хувь нь. Гэтэл эдгээр машинуудын 393.761 нь 10 буюу түүнээс дээш насжилттай, 94.739  нь 4-9 жилийн насжилттай байна. Ердөө 10.652 машин л 0-3 жилийн ашиглалттай байгаа аж. 

    AutoCom Japan байгууллагын захирал Н.Цэвээнцэцэгийн хэлж буйгаар сард 3000 орчим машин худалдаалагддаг гэнэ. Жилд дунджаар 36.000 машин. Нэг жолоочийн ард гэр бүлийн 3-4  хүн бий гэж үзвэл 100-120 мянган иргэний амьжиргааны асуудал. Улмаар хамгийн бага шатахуун зарцуулдаг нөгөөх ЭКО машины үнэ 5 саяар нэмэгдэж таарч байна. Ийм өргөн цар хүрээтэй иргэдийн нуруунд ачаалал өгсөн бодлого өөр хаана байна? Дээр нь шатахууны үнэ нэмэгдээд ирэхээр бүх бараа, үйлчилгээний үнэ огцом өсч таарна. 

    Машин нь үнэтэй, шатахуун нь үнэтэй, дагасан олон бараа таваар үнэтэй болоод ирэхээр эдийн засаг ширгэх тал руугаа хазайна. Ийм бодлогыг хэн ч бидэнд тулгаагүй. Харин эрх баригчидын чармайлтаар хэрэгжиж эхэллээ. 

    Ийм хэмжээний бодлого боловсруулж байгаа хүмүүс цааш энэ улсыг хэрхэн удирдаж авч явах вэ?  Үүнд МАН-д саналаа өгсөн иргэд, МАН-ын мянга мянган гишүүд буруугүй. Харин улирдлагад байгаа цөөн хүний мэргэжлийн бус засаг байгуулсан, бодлого боловсруулах чадваргүй хүний нөөцийн томилгоо хийсэн зэрэг алдаатай шийдлүүд нөлөөлсөн. 

    Төрт улсуудын түүхэнд сүйрч мөхсөн төрүүд иргэд олон түмнийхээ итгэл, дэмжлэгийг алдсан байдаг, татвараа нэмж ардаа зовоосон байдаг. Харин өсч мандсан төрүүд иргэдийн нуруун дахь ачааллыг бууруулж, улмаар татвар төлөгчдийн ашиг орлогыг нэмэгдүүлэх, эдийн засгийн эрх чөлөө, хөшүүргийг нь дэмжсэн байдаг. 

    Зарим хүмүүс хэлж байна. Энэ бүхэнд АН буруутай гэж. 2012-2016 онд АН-ын байдал энэ зүгт чирсэн гэж тэд гүтгэдэг. Үнэндээ алдаа, оноо аль аль нь байсан. Гэвч АН-ын бодлого шүүмжлэл дагуулдаг ч дундаж даврхага руугаа дэмжиж чиглэсэн байдаг. Жишээ нь ипотекийн зээл, жижиг дунд үйлдвэрлэлийг дэмжсэн зээл, за өнөөх шүүмжлээд байдаг зам харгуй. Дэд бүтэц, зам тээвэр хөгжсөнөөр бараа бүтээгдэхүүний тээврийн зардал шингэрсэн. Адаглаад л түгжирч зогсох цаг минут, шатахууны хэрэглээ нимгэрсэн байх жишээний. 

    Ер нь МАН нь АН аа, АН нь МАН аа "муучлах"  үзэгдэл сонин биш. Гол нь Монгол гэдэг энэ ГАНЦ айлын хэнээр нь ч овоглох хүүхдүүдийн хувьд үндэсний эрх ашиг, олон нийтийн ашиг сонирхлыг уландаа гишгэсэн үндэслэл муу шийдвэрүүд нь хэн хэнийг маань хохироож байна. 

    Бид нэг л эх оронтой. Улс төрийн намуудын талцал бол 100 дах асуудал. Харин нэн тэргүүний үнэ цэнэ болсон иргэдийн амьжиргааг зүйл бүрээр нухчин дарах агуулгатай бодлогоосоо МАН, Түүний дарга нарыг татгалзаач гэж хэлье. Бас шаардая. 

    ТАТВАРЫН ШАНААДАЛТ БА ДУНДАЖ ДАВХРАГАД ӨГЧ БУЙ ЦӨМИЙН ЦОХИЛТЫН ӨДӨР өнөөдөр ийнхүү тохиолоо. 

    2017 оны 5 дугаар сарын 1-ний өдөр. 

    Сүхбаатарын Эрдэнэболд  
     
    Статистикийн төв байгууллагын тоон мэдээллээс ашиглав.